Fracisco Niebro ye un de ls pseudónimos de Amadeu Ferreira (1950-2015), scritor, jurista i porsor de Dreito. Fui outor de un lhargo poemairo, de lhiteratura pa ninos, de cuontas i de l purmeiro remanse publicado an mirandés i an pertués, La Bouba de la Tenerie. Ye traduzido para bárias lhénguas i el mesmo fui tradutor, ponendo an mirandés obras cumo Ls Lusíadas, Mensaige, l Nuobo Çtamiento i L Mais Alto Cantar de Salomon, assi cumo outores clássicos cumo Hourácio, Bergildo i Catulo. A la par de l trabalho lhiterairo, dou-se a la dibulgaçon i al studo de la lhéngua, ampuso cursos, fizo palhestras, fui antuante de publicaçones de outros. Publicou tamien remiles de testos an redes sociales, an blogues pessonales i coletibos, an jornales, sendo por bias disso por bastante tiempo “l rostro de la lhéngua”. Fui l fundador de la Associaçon de la Lhéngua i Cultura Mirandesa.
Cebadeiros, que ten eiqui l sou segundo salimiento, fui l purmeiro lhibro que publicou na mirandés.
L B ye l nome de ua quadrilha de artistas. Naciu bai pa riba de dieç anhos, joldiando an amprobisos al redror las fiestas d’eimbierno i dando-se a lhabores andebiduales i feitos an cumpanha. Pula oubriga de mantener ua questume anhiega, ancarreirou an malta, que se deixa conhecer por ua lhanchinica que todos tráien. Nunca habie publicado an nome própio i dá-se hoije a conhecer por bias de l’oumenaige que le rinde a Amadeu Ferreira, sou fundador. Son de L B la capa i l trabalho gráfico de la coleçon Lhéngua, de que este ye l purmeiro lhibro.
